Meccijotolâhlaahâ
Meccijotolâhlaavâ mield moottorfiävroin tábáhtuvvee kištoi já hárjuttâsâi kiärdulii tâi pisovâš orniimân siämmáá enâduvâst kalga uuccâđ kieldâ pirâssuojâlemvirgeomâháá love.
Love ij kuittâg taarbâš taan tárguttâsân sajattâhkaavast väridum kuávlun ige kuávlun, moos lii adelum pirâssuojâlemlaavâst uáivildum pirâslope. Enâduvváin uáivilduvvoo eennâmkuávlu sehe jieŋâ luávdim čäcikuávlu.
Meid ovtâskâs tábáhtus orniimân kalga uuccâđ love, jis lii vyerdimist, ete tábáhtus toovât merhâšittee hemâdâs luándun, eres pirrâsân, asâmân, almos virkosmittemkiävtun, kyelipiivdon tâi eres almos tâi priivaat hiätun.
Tooimâ orniimân kalga leđe kuávlu omâsteijee tâi haldâšeijee miettâm. Lope occoo pirâssuojâlemvirgeomâháást uuccâmluámáttuvváin, mon tun kaavnah siijđo uálgispel roobdâst. Ucâmuš toimâttuvvoo kirjimkontturân.
Pirâssuojâlemvirgeomâhâš västid meid toimâkuávlu kieldâi meccijotolâhlaavâ miäldásij moottorkiälkkákiäinui kiäinuvuáváámij tuhhitmist sehe kiäinui koskâpuddâsijn tâi uccâ sirdemijn.
Meccijotoluv kocemân lohtâseijee aašijn ohtâvuotâväldimijd kalga čujottiđ Laapi poolislájádâsân teikâ staatâ eennâm- já čäcikuávlui uásild Meccihaldâttâs meccipivdokocemân.
Čäcijotolâhlaahâ
Čäcijotolâhlaavâ mield moottoristum čäcifiävroin tábáhtuvvee kištoi, hárjuttâsâi tâi eres tábáhtusâi kiärdulii tâi pisovâš orniimân siämmáá čäcikuávlust kalga uuccâđ kieldâ pirâssuojâlemvirgeomâháást love.
Love ij kuittâg taarbâš taan tárguttâsân sajattâhkaavast väridum kuávlun ige kuávlun, moos lii adelum pirâssuojâlemlaavâst uáivildum pirâslope. Love kalga uuccâđ meid ovtâskâs tábáhtus orniimân, jis lii vyerdimist, ete tábáhtus toovât merhâšittee pirâshemâdâsâid.
Love puáhtá mieđettiđ tuš, jis čäcikuávlu omâsteijee lii adelâm toos jieijâs miettâm. Lope occoo pirâssuojâlemvirgeomâháást uuccâmluámáttuvváin, mon tun kaavnah siijđo uálgispel roobdâst.
Olgonlihâdemlaahâ
Arktâsii Laapi pirâssuojâlem tuáimá olgonlihâdemlaavâ miäldásii leirâdâttâmsajevirgeomâhâžžân toimâkuávlustis. Leirâdâttâmsaje vuáđudem rääjist kalga majemustáá 3 mp ovdil tooimâ algâttem toohâđ almottâs kieldâ leirâdâttâmsajevirgeomâhâžân.
Almottâs puáhtá toohâđ rijjâhámásâžžân. Almottâs kalga anneeđ sistees tárbulijd tiäđuid leirâdâttâmsaje tuállest já saje sajaduvâst sehe tooimâ luándust já vijđoduvâst.
Čäcilaahâ
Čäcilaavâ miäldásiih ääših kuleh iänááš eres virgeomâháid. Kieldâ pirâssuojâlemvirgeomâháá toimâvááldán kulá tálutuálučääsi kiävtu raijim sehe aijui kuáivumân kyeskee ääših, eereeb čäcikuávlu pillâšuumân kyeskee aijui kuáivumäšši sehe čäcituáluhaahâ já aijui kuáivumtoimâttâs.