Pååđjälstemvuuʹd njeäʹšščaaʹʒʒi ǩiõttʼtõõllmõš
Pååđjälstemvuuʹd njeäʹšščaaʹʒʒin miârktet njeäʹššvuäjjsäimmõõzzi åålǥbeällsaž vuuʹdi täällnjeäʹšščaaʹʒʒid. Njeäʹšščääʹʒʒ âʹlǧǧe koolǥted da ǩiõttʼtõõllâd nuʹt, što tõin jiâ šõõdd pirrõõzz torkkjummuž vaar. Ǩiiddâlm vuäʹmsteei vaʹsttad pâi tõʹst, što ǩidlmin lij njeäʹšščääʹʒʒ ǩiõttʼtõõllmõõžž vääras ânnʼjõõvvi njeäʹšščaaʹʒʒi ǩiõttʼtõõllâmriâžldõk.
Redd- da påʹnnčääʹccvuuʹdin åårrai ǩidlmin âlgg leeʹd pirrõs-suõjjlemlääʹjjest meäʹrtõllum vuâđđtääʹzz puʹtstemõõlǥtõõzzi meâldlaž njeäʹšščaaʹʒʒi ǩiõttʼtõõllâmriâžldõk. Puʹtstemtääʹzz kuõskki õõlǥtõõzz jääʹǩǩtummšest pieʹstet automaattlânji ooccmõõžžtaa ǩiiddâlm vuäʹmsteeʹjid, kook liâ šõddâm ouddâl 9.3.1943.
Lååʹv čårrned vuâđđtääʹzz puʹtstemõõlǥtõõzzin lij vueiʹtlvaž vuäǯǯeed, jõs taarbšum investâsttmõš leʹčči ǩiiddâlm vuäʹmsteeja mååžntem. Čårrnummuž vueiʹtet miõttâd nuʹt põõššinalla jälstum ǩidlma ǥu âsttääiʹj ǩidlma. Čårrnummuž miõđât jäänmõssân vittân eeǥǥas vuârast.
Čääʹcchuâll-lääʹǩǩ
Čääʹcchuâll-lääʹjj (119/2001) täävtõssân lij tuõrvvâd nåkam čääʹcchuâll, što mååžna kuulin âlgg leeʹd vuäǯǯamnalla nokk tiõrvâsvuõđlânji da muđoi še kudd tääll/poorrâmčääʹcc di tiõrvâsvuõđ- da pirrõs-suõjjlummuž beäʹlnn ääʹššmeâldlaž njeäšščääʹʒʒ uiddummuš.
Čõkkpääiʹǩ åålǥbeälla ǩiiddâlm ij taarbâž õhtteed čääʹcchuâllstroiʹttel čääʹccjođđsa, jõs
- ǩiiddâlm čääʹcchuâllaparaatt liâ rajjum ouddâl čääʹcchuâllstroiʹttel tåimmjemvuuʹd priimm’mõõžž; da
- ǩidlmest liâ ââʹnnemnalla riʹjttjeeinalla tiõrvâsvuõttsuõjjlemlääʹjjest šiõttuum kvaliteʹttõõlǥtõõzz tiuddeei tääll/poorrâmčääʹcc.
Čõkkpääiʹǩ åålǥbeäʹlnn ǩiiddâlm ij taarbâž õhtteed čääʹcchuâllstroiʹttel njeäʹšščääʹccuiddeemvuåjju, jõs
- ǩiiddâlm čääʹcchuâllaparaatt lij rajjum ouddâl čääʹcchuâllstroiʹttel tåimmjemvuuʹd priimm’mõõžž da njeäʹšščaaʹʒʒi uiddummšest ja ǩiõttʼtõõllmõõžžâst jääʹǩǩtet, mâid pirrõs-suõjjlemlääʹjjest (527/2014) šiõtteet; leʹbe
- ǩidlmin ij leäkku čääʹccnuuʹžniǩ da tõn njeäʹšščaaʹʒʒi uiddummšest ja ǩiõttʼtõõllmõõžžâst jääʹǩǩtet, mâid pirrõs-suõjjlemlääʹjjest šiõtteet.
Jeeʹres määinast kååʹdd pirrõs-suõjjlemveʹrǧǧneeʹǩǩest vuäitt ooccâd piâssmõõžž njeäʹššvuåjju da čääʹccjođđsa õhttmõõžžâst. Oudldõssân čääʹccjođđsa õhtteemõõlǥtemvuõđâst piâssmõʹšše lij, što ǩidlmest lij ââʹnnemnalla õõlǥtõõzzid tiuddi tääll/poorrâmčääʹcc.
Oudldõssân njeäʹšščääʹccuiddeemvuåjju õhtteemõõlǥtemvuõđâst piâssmõʹšše lij jeäʹrbi mieʹldd, što ǩiiddâlm njeäʹšščaaʹʒʒi uiddummuš da ǩiõttʼtõõllmõš vueiʹtet riâššâd pirrõs-suõjjlemlääʹjjest šiõttuum õõlǥtõõzzi meâldlânji.